10.Vberschrifft an dem Tempel der Sterbligkeit/auß A. Gryphij Meletomenus Ersten...

Ihr jrr't in dem jhr lebt: die gantz verschränckte bahn

Läßt keinen richtig gehn. diß was jhr wündscht zu finden

Ist jrrthumb: jrrthumb ists der euch den Sinn kan binden.

Was Ewer Hertz ansteckt ist nur ein falscher wahn

Schawt arme was jhr sucht. Warumb so viel gethan?

Vmb diß was fleisch vnd schweiß vnd blut vnd gut vnd Sünden

Vnd fall vnd weh nicht hält; wie plötzlich muß verschwinden

Was diesen der es hat setzt in deß Todes Kahn.

Ihr jrr't in dem jhr schlafft jhr jrr't in dem jhr wachet

Ihr jrr't in dem jhr trawrt jhr jrr't in dem jhr lachet

In dem jhr diß verhöhnt vnd das für köstlich acht.

In dem jhr Freund als feind vnd Feind als freunde sätzet

In dem jhr Lust verwerfft vnd weh für wollust schätzet

Biß der gefund'ne Todt euch frey vom jrren macht.