24.An Iohannem Fridericum von Saack Equitem Siles

Könt' ich ein ander band' als trawte trewe finden

Als fester liebe krafft vnd vnverfälschte gunst

Vnd freundschaft die sich nicht geschminckt mitt falschem dunst

So wolt ich ewer Hertz Herr Sack damitt vmbwinden.

Weil ich mein wündtschen den auff nichts kan fester gründen;

Weill lieben vber stand vndt reiche pracht vndt kunst

Weill stärcker als der tod die flamme trewer brunst

So will ich euch vnd mich dar mit auff ewig binden.

Wofern in kurtzem wird (gleich wie wir wol verstehn)

Der vnverhoffte schlus des himmels für sich gehn

Der mich von Euch dahin ich nie gedacht wil führen:

So bleib ich dennoch hier ich las euch nichts den mich

Ein ander sicht mich nicht ihr könt mein ander ich

Ich sey auch wo ich sey mich nimmer mehr verlihren.