27.Threnen des Vatterlandes/ Anno 1636
Written 1640-01-01 - 1640-01-01
Wir sindt doch nuhmer gantz ja mehr den gantz verheret!
Der frechen völcker schaar die rasende posaun
Das vom blutt fette schwerdt die donnernde Carthaun
Hatt aller schweis vnd fleis vnd vorraht auff gezehret.
Die türme stehn in glutt die Kirch ist vmbgekehret.
Das Rahthaus ligt im graus die starcken sind zerhawn.
Die Jungfrawn sindt geschändt vnd wo wir hin nur schawn
Ist fewer pest vnd todt der hertz vndt geist durchfehret.
Hier durch die schantz vnd Stadt rint alzeit frisches blutt.
Dreymall sindt schon sechs jahr als vnser ströme flutt
Von so viel leichen schwer sich langsam fortgedrungen.
Doch schweig ich noch von dem was ärger als der todt.
Was grimmer den die pest vndt glutt vndt hungers noth
Das nun der Selen schatz so vielen abgezwungen.