32.Auff de Tag der Kirchweye. Luc. 19.

Wilst du die Gnaden Sonn den Herren Jesum seyn?

So laß das Zölner Haus die Werckstädt trüber Sünden.

Er läst sich nirgend sonst den auff der Creutzbahn finden

Auff auff! laß Hoff vnd Stadt laß eigen Gutt vnd Lehn

Ob Glaub vnd Fleisch wol klein ob gleich die Heuchler schmehn

Steig seinen Creutz-Baum auff bald wird was hindert schwinden

Bald wird er dich anschreyn vnd aller Schuld entbinden

Bald wird an deinem Haus vnd Seelen Heil geschehn

Doch must du voll von Reu was vnrecht gantz weglegen

Vnd von Betrug abstehn wofern sein reicher Segen

Sol geben was dir fehlt vnd abthun was dich kränckt.

Schau doch O Lebens Licht auff meine Buß vnd Zehren

Eyl in diß enge Hauß deß Hertzens einzukehren

Darauff kein Wächter acht vnd Abraham nicht denckt.