32.Auff Herr Herings Hochzeit. An die Brautt

Ob zwar die schöne zeit der Erden newes leben

Den Menschen newe lust den Bäumen newe zier.

Vnd Früchte wider schenckt doch trawrt jhr für vnd für

Vnd wolt Euch Jungfraw Brautt zu keiner Lust erheben!

Wie daß man euch doch siht in stetten schmertzen schweben:

Wo rührt dis Vbel her? Mich dünckt ich mercke schier

Den vrsprung aller pein; dir dir Cupido dir

Schreibt man die plage zu! Doch kan ich rettung geben

So sprach Er; vnd warff Pfeil vnd Fackel auß der hand

Vnd wagt sich auff die See der Mutter Vaterland

Als da er (was jhr wündscht) den Hering hat gefangen.

O mehr denn frembder fall Sol diß ein mittel seyn

Was Seuch vnd Feber bringt! Ja schrie Er diß allein

Ist was die Krancke sucht vnd was sie sol empfangen.