34.An einen Vnschuldig Leidenden

Ein brandt pfall vndt ein raadt pech folter bley vnd zangen

Strick messer hacken beyll ein holtzstos vndt ein schwerdt

Vndt siedent öel vndt bley ein spies ein glüendt pferdt

Sind den nicht schrecklich die was schrecklich nicht begangen.

Wer vmb die tugend leidt vmb rechthun wirdt gefangen

Vndt wen es noth sein blut doch ohne schuldt gewehrt

Dem wirdt für kurtze pein vnendtlich preis beschert

Er wirdt den ehren krantz der nicht verwelckt erlangen.

Er lebt in dem er stirbt er steigt in dem er fält

Er pocht was tödlich ist vnd trotzt die grosse welt

Vndt küst die ewigkeit die er ihmb anvertrawett.

Hatt nicht der Höchste selbst sein höchstes wunderwerck

In dem er starb verbracht auff Salems schädelberg?

Der ist kein rechter Christ dem für dem tode grawett.