34.Wir haben allenthalben Trübsal. 2. Cor. 4.

Was haben wir doch hir als Trübsal ach vnd Bande?

Doch schmacht die Seel' in Angst vnd stettem Trauren nicht

Ob schon vns Hertz vnd Fleisch vor Bangikeit zu bricht;

Reist kein verzweifeln eyn. Wir sind der Menschen Schande

Man stöst als böse Leut als Dieb' vns auß dem Lande

Vnd kränckt vns hir vnd dar doch wil deß Himmels Licht

In Elend bey vns seyn ob auch die Welt vns richt

Vnd gäntzlich vnterdruckt wir leben in dem Brande

Wir kommen keinmal vmb ob gleich deß Herren Tod

Durch so viel grimme Pein durch so viel grause Noth

Durch nicht erhörten Zwang stets an vns wird erneuet:

Weil auch das herrlich seyn das Christi Creutz erwarb

Der auch in gröster Qvall in höchstem Jammer starb

Erneut an vns die nichts den Angst vnd Creutz erfreuet.