69. Kleide die nackenden

Wie kanst du dich so vberflüßig kleiden

Vnd treiben pracht du fauler erdenklooß?

Da vnterdes der arme nackt vnnd bloß

Als wie ein wurm muss frost vnd kälte leiden.

Wie bist du doch so schrecklich vnbescheiden?

Wie denckst du nicht an den genaden schooß

Den Lazarus (nach dem er frey vnnd looß

Den leib quittiert) besitzt mit trost vnd frewden:

Was schadt es jhm hie nackt gewesen seyn?

Was hilffet dort den reichen in der pein

Sein purpurkleid sein prangen pracht vnd pralen?

Drumb kleidst du dich so kleide Christum auch

Bist du ein Christ. Das ist der Christen brauch.

Er wird es dir mit gnad' vnd danck bezahlen.