96. Sey bereit zu sterben/ wenn Gott wil

Wer seinen Gottesdienst nach Gottes wort bestellt

Vnd wer mit höchstem fleiß nach jenem leben strebet

Wer wie ein Christe sol nach Gottes willen lebet

Vnd wer so lang' er lebt des Herren wege hält

Der liebt was göttlich ist vnd hasset diese welt

Vnd weil sein hertze nicht an eitelkeiten klebet

Als welchs am himmel schon durch waren glauben schwebet

So macht er sich bereit zu gehn wenn 's Gott gefällt

Den weg der ewigkeit. Er weiss wol daß sein leben

In seiner macht nicht ist. Vnd weil 's jhm Gott gegeben

So weiss er auch das er 's jhm selbst nicht nehmen sol.

Drumb so du durch den tod das leben wilt ererben

So lebe wie du solt vnd warte mit dem sterben.

Bis daß es Gott gefällt so stirbst du recht vnd wol.