Als jhm von seiner braut ein krantz überschickt war:

Was wil der schöne krantz den mir mein' ehrenkrone

Für alle meine trew' vnd liebe schickt zu lohne?

Erzeiget-gläub ich-an: mein liebster augenschein

Woll' hinfort meinem häupt' an stat des krantzes seyn

O krantz o tewrer krantz die blüthe deiner jugend

Vnd jungfräwlichen zucht die blumen deiner tugend

Des guten namens ruch seind meines häuptes zier

Vnd meiste hertzen lust daran benüget mir.

Doch lass' ich mir den krantz von hertzen wolgefallen

Den mir mein hertzenkrantz (der krantz den mir für allen

Gott selbst gezeiget hat) mit eigner hand gemacht.

O krantz ich bleibe dein zu tag' vnd nacht bedacht.

Es müsse dieser krantz mein trewes hertz' vmbschliessen

Es müss jhn Venus selbst mit silber-taw begiessen;

Damit er nicht verwelck' vnd bleibe wie er ist

Mein angeneme lust die mir das leben fristt.