An Johannem Fridericum von Sack

Wüsst ich ein ander Band alß wahre Trew zufinden

Als feste Liebes Krafft als vnverfälschte Gunst;

Als Freundligkeit die nicht geschminckt mit falschem dunst;

So wolt Ich Euch hiermit mein trawter Freund vmbwinden.

Weil denn mein wündtschen ich kan auff nichts anders gründen

Weil auch Euterpe spricht daß ander ding vmbsonst.

Vnd Phœbus stärckers nichts jtzt find in seiner Kunst;

Wil Ich mit dieser Schnur Ewr Hand vnd Hertz vmbwinden

Die Eris nimmer trent; wird man in kurtzem sehn

Den vnverhofften Rath des Himmels vor sich gehn

Der sich von hinnen mich entschlossen hat zu führen

Hin wo Ich nie gedacht vnnd jemand möchte sein

Der weñ ich schon hinweg jhm wüntscht der Kundschafft mein

Der sol mich durch diß Band in Ewrem Hertzen spüren.