Antwort auff Herren Balthasaris Venatoris Teutsches Carmen an mich geschriben.

Wie ich empfangen ward wie man mich angenommen

Alß ich auff Helicon bin dieser Tage kommen

Auß Venus anbefehl zu

Ist mir am besten selbst vnd mehr als wohl bekandt.

Ich war den hohen Berg kaum recht hinan gestiegen

Da sah ich vmb mein Haupt mit grossem sturme fliegen

Flöt’ Harfen vnd Pandor: Es wardt ein groß gelauff

Apollo schrie mich an die Musen stunden auff.

Euterpe sonderlich springt zornig zu dem Bronnen

Den Pegasus gemacht eh ich mich wenden können

Geußt heuffig auff mich zu macht durch vnd durch mich naß

Daß ich der Musen gern vnd fast mein selbst vergaß.

Ich machte mich beyseit vnd setzt auß scham mich nider

Bey einem Lorbeerbaum bedachte hin vnd wider

Wie hefftig ich gejrrt daß ich solch ding begehrt

Daß keinen vor der Zeit die Musen je gewehrt.

In dem ich also saß in Scham vnd tieffen Sinnen

Kam Meleager her der Jäger der Göttinnen

Sagt daß er jetzundt erst vorbey gegangen sey

Vnd heimlich zugehört wie Erato so frey

Für mich geredet hab vnd hesstig sehr gestritten

Es würde Venus nicht so trewlich für mich bitten

Wann ich es nicht verdient: Darauff hab also bald

Apollo sie vnd sich gar wol zu fried gestalt.

Dem sey nun wie jhm will so lieb ich doch vor allen

Daß Meleager jhm mich läst so wolgefallen.

Lobt er vnd Erato mein newes Seytenspiel

Der gantze Helicon mag bleiben wer er will.