Auf das seelige absterben Hn. Abraham Schmiedes:

Wer zu diesen bittern zeiten

Auff das süsse vaterland

(Welches vns wie denn bekant

Nach sich zeucht) gedenckt zu schreiten.

Der muß jhm wol zu bereiten

Was er darff bey tag' vnd nacht

Daß er ja der räuber macht

Mög' entgehn auff allen seiten.

Er muß durch berg' vnnd thal vnnd mehrentheils bey nacht

Er wacht wenn man sonst schläfft er schläfft wenn man sonst wacht

Sein liecht vnd fewerzeug ist fertig die laterne

Ist immer bey der hand. Es leuchten jhm die sterne

Vnd auch der trübe mon: vnd wird er denn besetzt

So weist er seinen paß damit jhn niemand letzt

Er pocht auff diesen paß er schawt auff sein geleite

Er past auff seinen stab vnd auffs gewehr' im streite.

Also wer durch schweres reisen

Dieser welt zu seinem ziel

Wenn er soll in himmel wil

Lasse sich des vnterweisen

Daß er sich nicht lasse speisen

Mit geschwetz' vnd list bey nacht

Vnd geraht' in feindes macht.

Daß er hab' ein paß zu weisen.

Ist den die welt ein thal vnd diese zeiten nacht

Vnd wollen wir hindurch zu Gott der vns bewacht

So ist sein geist das liecht sein wort ist die laterne

Die kirch' ist denn der mon die lehrer seind die sterne

Vnd hätt' vns Belial auch weg vnnd steg verrent

Hat vns doch vnser Gott verehret vnd ernent

Den glauben als ein paß die liebe zum geleite

Die hoffnung als ein stab gedult zur wehr' im streite.

Dieses hat zu seinem frommen

Dem wir hie zur leibes ruh

Geben das geleite nu

Jederzeit in acht genommen.

Drumb ist jhm auch nun benommen

Was in diesem jammerthal

Vns beschweret allzumahl

Er ist nun zur ruhe kommen.

Durch dieses thränenthal durch diese schwartze nacht

Ist er hindurch zu Gott. Gott hat jhn wohl bewacht

Der glaube war sein paß die liebe sein geleite

Die hoffnung' vnd gedult sein stab vnd wehr' im streite.

Nun er hat wol gekämpfft er hat die lebens kron'

In vester zuversicht wol jhm gebracht davon.

Nun er ist an das liecht. Denn Christus seine sonne

Lässt sich jhn tröstlich sehn zu voller frewd' vnd wonne.