Auf den seeligen abscheid Der viel ehr- vnnd tugendreichen frawen Helenen Schnit...

Ein vestes tugend-schloß ein wohnhauß guter sitten

Eine hohe burg der zucht einn tempel den der geist

Des Herren eingeweyht vnd Christum drein geweist

Hat zwar der tod an euch bestritten vnd beschritten

Ihr edle tugend-bluhm': jhr habet zwar gelitten

Was sonst die welt den tod was Christus schlafen heisst:

Der tod hat aber nicht (wie sehr er tobt vnd reisst)

Ewr leben gantz vnd gar euch darumb abgeschnitten.

Die seele lebet noch! denn Christus ist ewr leben

Vnd ewrer seelen seel'. O wer sich dem ergeben

Der lebet wenn er stirbt! das grab ist seine ruh:

Der tod sein sanfter schlaf der jüngste tag der morgen

An dem man aufersteht ohn' alle forcht vnd sorgen

Vnd wallet in dem Herrn nach seiner frewde zu.