Auf herrn Johann Wedemeyers vnnd jungfraw Susannen Barbierin hochzeit:

Lustige Sappho lass die säiten klingen

Edele Musen fanget an zusingen

Liebliche nymphen schicket euch zuspringen

tantzen vnd schertzen.

Schmücket euch zierlich heut' an diesem tage

Windet euch kräntze schließet alle klage

Machet euch frölich denckt an keine plage

Leiden vnd schmerzen.

Denn jhr geliebet denn jhr habt gelehret

Denn jhr geehret denn jhr habt geehret

Diesen hat Amor wunderlich verseeret.

Mit einer kertzen.

Mit einer kertzen vnd mit einem pfeile

Nicht ohne schmertzen doch in schwinder eile

Must er auß schertzen für die lange weile

Lieben vnd hertzen.

Zwar ohne narben doch nicht ohne schmertzen

Spaltet dein bogen vngetrente hertzen

Welche dich Amor deine pfeil' vnd kertzen

Halten für schertzen.

Seyn es nicht schwencke seyn mir das nicht bossen

Seyn es nicht rencke einer wird geschossen

Mitten ins hertze bleibt doch vnverdrossen

Sich zu verwunden.

Seltsame waffen wunder schneid' vnd spitze

Seltsames brennen wunderfewr vnd hitze!

Seltsame pfeile wunderlicher schütze!

Seltsame wunden!

Hilffe Vultejus vnd Justinianus

Bartolus Baldus oder Vlpianus

Curius Cæsar Tacitus Thuanus

Cicero Cato

Flaccus Homerus Gellius Cratinus

Maro Plutarchus Plinius Justinus

Livius Florus Seneca Solinus

Bias vnd Plato.

Wenn dieser leute hochberühmte schriften

Einiges mittel wieder den vergiften

Veneris abschoß wüsten anzustiften

Dem zu entgehen

Würd' vnser bräutigam keine schmertzen klagen

Noch vnabläßlich nach dem artzte fragen

Jhn würde freylich keine wunde plagen

Wie wir denn sehen.

Wüste der Adler aller welt gelehrten

Rath zu den sachen wären die jhn ehrten.

Gegen den Amor als gar wol bewehrten

Sicher vnd fahrloß.

Aber je schöner weiser vnd gelehrter

Frischer vnd stärcker wir seyn vnd bewehrter

Desto geschwinder schlimmer vnd verkehrter

Macht er vns wahrloß.

Drümb jhr berühmter spiegel vieler tugend

Kühlende Lilge blum' vnd preiß der jugend

Welche zu preisen sich mein verß nicht fugend

Hat vnterwunden.

Andere Venus vierde holdgöttinne

Edeles wohnhauß für die seel' vnd sinne

Des der euch liebet o jhr meisterinne

Sehet die wunden

Welche Cupid' hat vngewarnter sachen

Kraft ewrer tugend ewrer red' vnd lachen

Ewrem geliebten tückisch dörfen machen

Ohne verbunden.

Bindet jhn sanfte pfleget seiner wunden

Welch' er gefährlich wegen ewr empfunden

Dencket daß ohn' euch niemand wird gefunden

Jhn zu genesen.

Dencket jhr vrsach' alle seiner wunden

(Welche von euch nur wollen seyn verbunden)

Daß euch zu ärtztin Gott zu guter stunden

Jhm hab' erlesen.