Auf Herrn Reinhold von Möllen christliche leichbegängnis

Wer seelig sterben wil der muß auch seelig leben

Wer seelig leben wil der dencke stets an'n tod

Wer stets an'n tod gedenckt dem wird die todes-noth

Wol nicht zum tode seyn. Wol sterben kömmt vom streben

Nach der vnsterblichkeit vnd macht das sterben eben

Als eine lebens-thür. So wird das Charons-booth

Zum himmelischen port. das lebendige brodt

Das vns der himmel gab wird so das leben geben.

Dis nam gar wol in acht dem wir zu seiner ruh'

Itzt geben das geleit' vnd vberdis dazu

Ein zeugnis welches jhm sein name hat gegeben

Vnd auch die that nicht nam: Er war dem reinen hold.

Des Herren reinigkeit ist sein genaden-sold.

Drumb starb er nur dem tod' vnd lebt nu seinem leben.