Auf hn: Georg Flatawen vnd jungfraw Chatarinen von der Siepe hochzeit:

Der süssen liebe frucht durch zucht ist zu erlangen

Vnd wird durch zucht gesucht. Wer wollust nach will hangen

Der suchet was er findt vnd findet was er sucht

Sein elend vnd verderb: wird gottloß vnd verrucht

Vnd leschet nimmermehr sein dürftiges verlangen.

Drumb soll die jugend sich durch tugend vnterfangen

Zu schmecken diese frucht erbleichen schon die wangen

Vnd fühlet hertz' vnd leib schon seiner kräffte flucht

Nach süsser liebes frucht.

Weil denn herr bräutigam euch nie die böse sucht

Der wollust angesiegt welch' jhr mit ehr' vnd zucht

Noch täglichen bekriegt. So wartet ohne bangen

Nach dem drey dreymal-vier an siebnen ist vergangen

(Was mancher nimmer findt ob er gleich immer sucht)

Der süssen liebe frucht.