Auff Herr Daniel Hein/ vnd Jungfrawn Annen Krausen hochzeitliches ehrenfest:

Vnd jhr herr bräutigam habt auch nun lust zu kriegen

Weil jeder kriegen wil vnd dencket obzuliegen

Da mancher held erliegt vnd keiner siegen kan

Vnd wär' er noch so kühn' vnd noch so starcker mann.

Wer hat den jungen held Achilles vberwunden?

Wer hat den krieges-gott den grossen Mars gebunden?

Wer gab dem Hercules nach dem er vberwand'

Vnd vberwunden war den rocken in die hand?

War 's nicht ein solcher feind dem Venus hatte geben

Den schlüssel in die hand zu seinem tod' vnd leben

Ein schönes frawen-bild? war's nicht ein solcher feind

Wie der mit dem jhr auch zu fechten jetzt vermeint?

Ich weiss was jhr gedenckt die Pallas werd' euch leyen:

(Weil jhr sie jederzeit bedient mit allen trewen)

Jhr schwert vnd jhren helm jhr schild vnd was sonst mehr

Ein kriegesmann bedarff von allerhand gewehr'.

Ey ey wie weit gefehlt jhr habt ja wol vernommen

Daß Pallas seit der zeit nie sey zu felde kommen

Nach dem die Venus sie bezwungen gantz vnd gar

Da sie doch wohl gerüft vnd Venus nacket war.

Ewr feind ist wol gerüstt: das bett' ist jhre schantze

Die Liebe das geschütz; jhr augenliecht die lantze:

Die brüste seyn das schild; der mund die oberwehr

Jhr lachen kraut vnd loth vnd was des dinges mehr.

Ewr feind ist schon gerüstt vnd jhr solt waffen borgen

Das wäre was zu spat. Auch müstet jhr besorgen

Daß solch geborgter zeug möcht' alt' vnd rostig seyn

Vnd legen schimpf vnd spott für ehr' vnd siegen ein.

Ich förcht' ich förchte sehr jhr werdt die schlacht verlieren

Es wolt' euch Venus denn nu selber außstafieren

So hat es seinen weg so geht das streiten ein

Daß also zwischen euch mag steter friede seyn

O süsser friede-krieg wem solte nicht genügen

(Weil keiner in dir siegt) in ehren zuerliegen?

Wolan genug geschertzt. Euterpe habe danck

Dictierst du mir noch mehr so wird es gar zu lang.

Das schwartze kleid der nacht hat ohne das bezogen

Aus Venus angetrieb den blawen himmel-bogen

Das süsse liebe-paar siht schon einander an

Vnd dencken: wäre doch dis wesen schon gethan!

Sie dencken an den krieg sie dencken an das streiten

Sie dencken an die schlacht sie dencken an die beuten.

Der krieg ist ohne zorn; der streit nicht ohne blut;

Die schlacht nicht ohne tod; die beute köstlich-gut.

Nu jungfrawn kommet an vnd dantzet in die wette

Die braut wil an den tantz; der bräutigam zu bette.

Drumb macht es nicht zu lang die braut hat wenig zeit

Sie soll ich schertze nicht noch diese nacht annstreit.