Auff Herrn Gottfried Eichhorns JC. vnnd Jungfraw Rosinæ Stoltzin Hochzeit

Ob gleich der weisse Schnee jtzt Berg vnd Thal bedecket

Vñ manch geschwinder Fluß zeucht einen Harnisch an

In dem Er sich des Zorns der Kälte wehren kan

Vor welcher jeder Baum steht gantz vnd gar erschrecket.

Ob gleich der bleiche Frost die scharffe Seenß außrecket

Vñ alle Blümlin fält so Flora auff dem Plan

Der Erden vmb vnnd vmb zuvor hat sehen lan

Hat doch die Lieb in Euch ein grosses Fewr erwecket

Herr Gottfrid vnnd darzu noch eine Rose bracht

Daß Ihr des Winters schärff vnd rasen sicher lacht!

Woll Euch vnd aber wol! ist was das Ihr begehren

Noch mehr vom Himmel mögt wenn Euch zu dieser Zeit

So schöne Rosen sind mit solcher wärm bereit

Wird Euch der Herbst gewiß viel schöner Früchte geben.