Auff hn. Benedict Ficken hochzeit:

Der blutdürstige Mars macht durch das schweere kriegen

Daß aller handel fast daß alle könste liegen

Daß alle lust verlischt daß alle frewd' auff hört

Daß alles liebe laut in lauter leid sich kehrt.

Cupid' im gegentheil kriegt nimmer ohne siegen

Macht allen handel vest; vnd alle könste fliegen

Bis an Junonis saal; erwecket lust vnd frewd

Vnd wendet durch den laut der lauten manches leid.

Mars führet grossen krieg Cupido thut desgleichen

Jhm muss der grimme Mars wie trotzig er ist weichen

Cupido nimmt durch list die süsse sieges lust

Mars sucht durch schwere last vnd vnlust oft verlust.

Wär' ich an seiner stat ich macht' es wie Cupido

Ich führte junges volck das würbe mir Lubido

Den wer zum kriege dient dem dient auch liebes sieg

Vnd wer zur liebe dient der dienet auch im krieg.

Solt' ich ein wenig nur an Martis stat regieren

Ich wolte mir mein heer wol anders ausstafieren

Der Hymen müste seyn der stücke Corporal

Cupido feldmarschall vnd Venus General.

Gelerthen müsten seyn die besten Officierer

Vnd der poeten volck Cornet- vnd Fänelführer

Der musicanten schaar solt' ein furierer seyn

Vnd theilen par bey par in die gvardieren ein.

Den müste man hernach auch Marcketäner haben

Das könte Ceres seyn vnd nasse Bachus-knaben

Voluptas wäre denn die musterschreiberin

Invidia profoß vnd denn nach meinem sinn

Die witwer; Kürisser die witwen; Bickenierer

Gesellen; reuterey jungfrawen; Musquetierer

Das wär' ein schönes volck für anderm sonderlich

Zum kriege zugerüst't das wär' ein volck für mich.

Mars fahre wie er kan ich halt' es nu mit lieben

Das lob' ich weil ich leb' vnd liebe durch betrüben

Der süssen lieb noch zukommen dahin an

Dan mancher hin gedenckt vnd nicht hinkommen kan.

Herr bräutigam mich deucht vnd wolte wol drauf wetten

Jhr haltet es mit mir Cupido schantzt mit betten

Vnd Mars mit erd' vnd sand Cupido schlägt nicht todt

Wie Mars. Nu fahret wol in frewd' ohn' alle noth.