Auff hn. Johannis Pauli/ vnd fraw Helenen Wolßen hochzeit:

Der Venus jtzt verspricht einn grünen myrten-krantz:

Vnd der die Gratien gantz willig seyn zu weichen

Weil jhre zierlichkeit jhr keine kan erreichen:

Der Arete verehrt all jhrer zierde glantz:

Die meine Musa lobt als die die gar vnd gantz

Der süsse Nymphen-chor jtzt rühmlich aus zu streichen

Bereit vnd fertig seyn: vor welcher muss erbleichen

Die Griechsche Helena: die führt jhr jtzt an dantz.

Herr bräutigam wolan weil jhr solch glücke habet

Daß euch der milde Gott mit Helenen begabet

An der ein jeder spürt was wahre schönheit preist

Der auch Penelope was züchtige gebärden

Vnd ehrbarkeit betrifft kaum kan verglichen werden

So mein' ich daß jhr recht Begnadet seyd vnnd heisst.