Auff hn. Michael Widers vnd fraw Annen Proiten hochzeit:
Wie wenn die sonn in'n Wider trit
Vnd bringet vns den lentzen mit
Die zeit die vns erfrewet
So kömmet laub vnd graß herfür
Vnd macht vns auff der liebe thür
Die alle ding' ernewet.
Also viel-tugendsame braut
Werdt jhr nu wieder-anvertrawt
Als eine klare sonne
Dem Wider der ewr früling ist
Der ohn' euch seiner selbst vergisst
Jhr seine frewd vnd wonne.
Das macht die süsse liebe nur
Die amm' vnd mutter der natur
Die vrsach' aller sachen
Die noch so lang' es jhr gefällt
Den grossen baw die welt erhält
Für jhrem fall' vnd krachen.
Denn allem was die schöne welt
In jhren armen in sich hält
Als gluth fluth lufft vnd erde
Vnd allem was daraus gemacht
Ist liebes samen bey gebracht
Damit's erhalten werde.
Man siehet wie das blawe rund
Thut gleichsam seine liebe kund
(Nicht ohne frucht) der erden
Die göldne sonne leyht jhr haar
Dem silber-mone das er klar
Vnd liechte möge werden.
Die sterne schmücken auß die nacht
Die Iris ist darauff bedacht
Wie sie mit jhrem regen
Der Ceres könne nütze seyn
Die Ceres bringet gersten ein
Des Bachi durst zu legen.
Der Zephyrus der wird auch nu
Der Floren lieblich sprechen-zu
Vnd kleiden seine docke
Vor grosser lieb' in grün in gehl
In weiss in roth ohn' allen fehl
Mit einem bunten rocke.
Die leichten vögel in der höh'
Vnd alles was die weite see
In sich begreifft muss lieben:
Man sieht wol daß der erdenkreiß
Fast nicht ein thier trägt daß nicht weiss
Von lieb' vnd lieben üben.
Das macht die liebe die an itzt
Herr bräutigam euch hat erhitzt
Vnd euch so weit getrieben
Das jhr durch solches angetrieb
Ewr ander Ich ewr süsses lieb
Von hertzen müsset lieben.
Jhr müsset jhr vnd sie muss euch
In gleicher liebe werden gleich
Eins muss dem andern gleichen
Denn kann auch eines wie es soll
Dem andern als denn recht vnd wol
In bilgen sachen weichen.
Wolan herr Wider frewet euch
Ewr edle sonn' ernewet euch
Durch jhre krafft vnd tugend
Sie bringet euch viel frewd vnd ruh
Sie wendt-euch Gottes segen-zu
Im früling' ewrer jugend.
Ewr früling kömmet nun herzu
Mit lieb' vnd lust mit frewd' vnd ruh
Mit fruchtbarkeit vnd wonne.
Ewr früling kömmt bekennt ein jeder
Die sonne tritt heutt' in den Wider
Der Wider in die sonne.