Beschluß Sonnet

Mehr hatt Ich vor der Faust; doch wer thar hier was schreibẽ

Weñ eine Fraw dem Man ein Leinen Tuch versagt

Ins Grab vnd wenn sie kaum den andern hat der Magd

Beut hundert Thaler an daß sie Ihn helff auffreiben

Durch Lügen oder ja durch Zeugnüß Eyl zutreiben

Dem Hencker in sein Schwerd; vñ hier kein Armut klagt

Die doch wol sonst für Gott nicht einen Kreutzer wagt;

Wil sie doch daß Ihr thun sol vngetadelt bleiben.

So geht es hin vnd her; man sündigt frey hinein

Gantz ohne schew vnd scham vnnd sol doch niemand sein

Der diß was jeder thut dörfft offentlich erzehlen

Denn Warheit schmertzt vnd reist; doch kombt gar offt an Tag

Diß, was nach vieler Sinn gar tieff verborgen lag

Vnnd muß der Warheit nie Lufft Red vnd Freyheit fehlen.