Das ewangelisch baner.
Written 1506-01-01 - 1506-01-01
Das ander baner, das sie tragen,
Da můß ich fieren bitter klagen,
Het in vff erd kein mensch empfolhen,
Sie hons der cristen gemein gestolen.
Die heilig gemeine cristenheit
Hat vnß vff erd allein geseit
Vnd gelernet ire kind,
Welches die ewangelien sind.
Ia wan ir keins beschriben wer,
So blib dannocht cristus ler
In lebndigen büchern beschriben
Vnd wer in vnsern hertzen bliben.
Des sie vnß felschlich wöln berauben,
Der cristlich gemeinen nit glauben,
Der iederman glaubet baß.
Da noch kein ewangelium was
Beschriben von den ewangelisten,
Glaubten doch die gemeinen cristen,
Was sie die botten cristi lerten
Vnd von iren mündern hörten.
Das ist also gehalten bliben,
Da noch kein bůch nit was geschriben.
Noch glaubt man gemeiner cristenheit,
Was sie von cristo lernt vnd seit.
Biß sie nachgons an genumen hat
Die ewangelisch beschribne dat,
Die selbig lieblich, frölich mer,
Von got gesant von himel her;
Die hon sie an so manchem ort
Gerincklet wol vff tusent mort
Vnd zerren daruß den verstant,
Den vnsere gemein nie hat erkant.
Wer kan das ewangely fron
Im grunt vff erden baß verston
Den die frum vnd cristlich gemein,
Die weder lügt noch trügt kein?
Darumb wa du mir zögst ein span,
Den wil ich an die gemein lan;
Was mir die gemein erkent darin,
Das sei der ewangelisch sin,
Das nim ich für ein warheit an
Vnd wil bei irem vrteil stan.
Die cristenheit hat nie gehuncken:
So wil es mich nit sicher beduncken,
Das ich weich von der cristenheit
Vnd hör, was mir ein eintziger seit.
Die gemein, die mir vor hat gegeben
Das heilig ewangelisch leben
Vnd mich bericht on argen list,
Welches das ewangelium ist,
Die thůt mir das auch wol bekant,
Welches sei der recht verstant.
Den wil ich von der gemein gern hören
Vnd nit erst von eim weber leren,
Der me verwürt vff einen tag,
Dan ich mein lebtag schlichten mag.
Ich sag es noch habs vor auch geseit,
Mein lerer ist die cristenheit,
Vnd laß mich kein eintzigen man
Bringen vff ein andern plan.
Das ewangelium fürwar
Ist me dan fünfftzehen hundert iar
Gewesen bei der gantzen gemein,
Die solchs baner tregt allein.
Wem sie das selb nit hat empfolhen,
Der hat es wissenlich gestolen.