Das Lied/ auff die weise: Si c' est pour mon pucelage

Cinthia durch aus wil fräwen!

Was kömmt doch das mägdlein an?

Daß man jhr nicht sagen kan!

Fräwen wird sie freylich rewen.

Nein. Der Venus-vogelleim

Ist jhr süss als honig-seim.

Was seind alle Venus rencke?

Kinder-werck vnd affen-spiel:

Sorg' vnd' kummer ohne ziel:

Hoffen forcht vnd faule schwencke.

Amor dunckt die pfeiler ein

Drey in frewd' vnd sechs' in pein.

Wil euch jhr gesellen binden

Amor an sein joch ach nicht.

'S ist so breit nichtals man spricht.

Kommt jhr dran jhr werdt befinden

Daß kein mann so wol gefräwt

Der nicht finde was jhn rewt.

Wil euch geld vnd gut bethören

(Armer fräwer schlipfrig eiß:

Kleine liebe groß verweiß)

Sollt jhr offtmal müssen hören:

'S ist mein teller der da klingt:

Denckt wie das durch 's hertze dringt!

Seyd jhr reich an geld' vnd gründen

Vnd erwehlt euch denn ein lieb.

Kriegt ewr beutel als ein sieb

Löcher; dieses steckt dahinden

Bis so lang' jhr seyd getrawt

Denn so macht sie 's das euch grawt.

Habt jhr denn nicht viel zum besten

Vnd nemt eine die nichts hat

So sucht jhr vnd findt nicht raht

Sprew vnd träber vbel mästen.

Lähre beutel schlechter muth.

Wer gewinnet ohne gut?

Fräwet jhr denn schön vnd lieblich

Reiset aber offt von haus'

Ey so siht es seltzam aus

Paris kömmt gewiss als üblich

Helena schläfft nicht allein'

Jhr müsst Menelaus seyn.

Nemt jhr aber alt von jahren

Oder sonsten vngestalt

So ist 's wieder schlecht bestalt

Sintemal noch nie erfahren

Daß man fewr aus eise schlägt;

Vnd ein eul' ein sperber legt.

Hat ewr lieb denn vnter vielen

Bey sich etwas mehr verstand

Weder sie im Rocken fand

Dann so wil sie meister spielen

Zeuht wol gar die hosen an

Vnd regieret als ein mann.

Habt jhr eine die viel kindert

Vnd ist alle jahr befrucht

Jeder mund das seine sucht

Jede tauff' ewr gütlein mindert

Kleine kinder böse vieh:

Grosse kinder grosse müh'.

Ist ewr weib denn wol besprochen

Balde führt sie 's grosse wort

Kömmt euch alle tag' an port

Dann wird fried vnd ruh gebrochen!

So sie nicht pausieren kan

Fanget jhr das Lamt an.

Kriegt jhr eine frisch von füssen

Die wil dantzen nachte lang

Pocht auff jhren trotzen gang.

Manchen den das wil verdriessen

Dem erregt das übelspiel.

Schilt er viel so leufft sie viel.

Gibt sie als jhr gerne höret

Süsse wort aus sanfftem muth'

Auch ist solches nicht sehr gut.

Stroh' ist 's als man offt erfähret.

Kommt's fewr frembder liebe drein

'S brennt da wird kein leschen seyn.

Weg mit lieb' vnd wieder-lieben

Ist's nicht gut alleine seyn?

Wozu sol die liebes-pein?

Wozu wil man sich betrüben

Mit dem was einn andern nagt?

Jeder sey mit sich geplagt.

Das ist das lose lied das lästerliche sprechen

Davon mir 's hertze schier im traume wolte brechen

Diana dein gesang sprach ich ist nur ein dunst.

Cupido wird an dir noch üben seine kunst:

Er wird dein stoltzen muth vnd deinen überwillen

Mit einem scharffen pfeil' in schwinder eile stillen

Vnd rächen seinen spott. Vnd Cinthia wird dir

Den mund in kurtzer zeit wol bieten gläube mir.

Kommt her jhr jungfräwlein vnd heisst Dianen liegen

Komt jhr gesellen hört vnd lasst euch nicht betriegen.

Diana wie jhr wisst ist jägerey gewohnt

Weiss derowegen nicht wie trewe liebe lohnt.