Lied Auff hn: Christoff Gottwaldes vnd jungfraw Susannen Bödkers hochzeit:

So frewe dich mit springen

Du wolgetröstes Hertz

Reitz' an den mund zu singen

Zu lachen vnd zu schertz.

Dein leben hat verbunden

Dir alle liebes-wunden

Nu lindert sich dein schmertz.

Uon euch wurd' ich betrübet

Von euch werd' erfrewt

Von euch werd' ich erfrewt

Von euch werd' ich ernewt

Ohn' euch jhr edler reben

Ohn' euch kan ich nicht leben

Die jhr mein leben seyd.

So lohnet trewe liebe

So lohnet liebe trew

Lass sehn mein hertz' vnd übe

Was rechte liebe sey.

Recht lieben kömmt von oben

Recht lieben ist zu loben

Recht lieben ist dir frey.

Ach was mag in euch schweben

Jhr hellen äugtlein

Für tugend krafft vnd leben?

Du rosen-mündelein

Kan doch dein lieblich sprechen

Erquicken vnd entbrechen

Ein hertz' in todes-pein.

Nicht anders war mein hertze

Als hätt' 's den tod geschmäckt

Es war mit forcht vnd schmertze

Begraben vnd bedeckt

Nun aber jhr mein leben

Jhm geist vnd krafft gegeben

Habt jhr 's vom tod' erweckt.

Nu mögen wol für allen

Nepenth vnd edelstein

Die rohten mund-corallen

Für trawren kräfftig seyn?

Das hab 'ich schon gespüret

Vnd an euch wol probieret

Corallen-mündelein.

Ach jhr meins leben leben

Meins hertzens hertz' vnd geist

Jhr könnet athem geben

Wenn lebens-fadem reisst

Wenn hertz' vnd augen brechen

Gebt jhr mit blossem sprechen

Das leben liecht vnd geist.