Liedt.

Mein feines Lieb ist fern von mir

Ich hat mit jhr sehr kurtze frewdt

Sehr kurtze frewdt hat ich mit jhr

Das macht mir desto grösser leidt

Mein Tag bring ich mit seusstzen zu

Mitlauter Vnruh meine Ruh:

Mein Hertz hat sie genommen mit

Es halff kein Klag es halff kein Bitt.

Ihr seuftzen ach jhr seuftzen mein

Die jhr so heüffig eilt von mir

Fahrt hin zu meinem Liebelein

Fahrt hin vnd sagt der Edlen Zier

Daß jhr getrewer Diener sich

Vmb sie bekümmer inniglich

Ohn vnderlaß insolchem schmertz

Gedencket an jhr Keusches Hertz.

Gleich wie ein Turtelteubelein

Das sein Gesellen hat verlohrn;

So sitz ich trawrig vnd allein

Das schwinde scheiden thut mir zorn

Ach scheiden ach zum letzten mahl

Da fing erst an die rechte Qual

Zum letzten mahl da sie fort ruckt

Mein Hertz ich in jhr Lefftzen truckt.

Ich hab euch jwar so lang erwehrt

Daß mich kein Jungfraw fangen solt

Nun seh ich wohl euch ist beschert

Daß ich euch muste werden holdt

Ihr ward die jenig jhr allein

Ihr seyt es vnd jhr solt es sein

Die mich durch jhre lieblichkeit

Vnd Tugent also hat verleit.

Ach liebstes Lieb kehrt wieder vmb

Kehrt vmb ach liebstes Liebelein

Eh dann ich gantz vnd gar vmbkumb

Vnd geb mir nur ein Zeichen klein

Kan es nit mit dem Leibe sein

So last es doch ein Schreiben sein

Hab ich so vil genad bey euch

So frag ich nach keim Königreich.