Reverẽdo Clariss. Doctissimoq; Domino M. Michaeli Edero

In dieser letzten Zeit da Trew vnd Lieb erkalten

Da all Auffrichtigkeit schier gãtz vnd gar verschwind

Da man vom Christenthumb nicht viel mehr vbrig find

Da Heiligkeit vnd Trew vñ Gottes Furcht vor alten;

Seid Ihr noch drauff bedacht die Tugend zuerhalten

Vnd lehret mit der That wie jtzt ein Trawtes Kind

Des Höchstẽ nicht allein erken' die Grause Sünd

Vnd seines Glaubens Ampt mit wissen sol verwalten;

Ihr heisset noch darzu das jeder sich befleiß

Zu würcken offentlich diß was sein Hertze weiß

Da sonst wol mancher denckt es sey genung am wissen;

Wie Seelig seid Ihr doch!weil Ihr der Ehrenkron

Die nicht mit wissen nur erlãgt wird vor dem Thron

Des Richters aller Welt solt würcklich auch genissen.