Schawgericht' Auff Hn. Haus Kohl/ vnd fraw Catharina Riecken hochzeit:

Venus hat wie wol bekant

Newlich guten kohl verbrant

Kohl; der lust zur speiß erwecket

Kohl; der wol vnd süsse schmecket

Kohl; den sie selbst hat gesäht

In jhr grünes Myrtenbeth

Kohl; den sie offt vnverdrossen

Hat mit eigner hand begossen.

Aber wie es sey geschehen

Daß es Venus so versehen

Wil ich jtzund nicht verschweigen

Sondern also bald bezeugen:

Venus war geschlaffen ein

Amor warff jhr kohlen drein

Kohlen; die kein leschen dämpffet

Deren brand mit wasser kämpffet.

Dennoch schmeckt der braut der kohl

Als ich meine rechte wol

Wird er schon in diesen tagen

Jhr mit kohlen auffgetragen.

Aber's bleibe nicht dabey

'ch schweere dis bey meiner trew':

Eh die mägde töpffe netzen

Vnd auff morgen kohl bey setzen

Wird der kohl in liebes pein

Gar zu kohlen worden seyn.