Vff Herrn Ludwig Hebers Hochzeit.

Triumph du keusche Lieb triumph du nun solst singen

Die gegenwertig Zeit mit Ehr vnd Frewd vollbringen.

In beider Ehleuth Hertz rüst deinen Wagen auß

Fahr als ein Siegerin in das bekante Hauß.

Dann du das schöne Joch darnach vor kurtzen Zeiten

Der Bott deß Todts getracht dasselbig außzureutten

Auffs new erobert hast: da doch fast gantz vnd gar

Hinweg deß lebens trost hinweg die hoffnung war.

Du hast die tödlich hitz als sie so kranck da lagen

Daß auch in sie der Todt sein letztes recht wolt wagen

Verendert in ein hitz davon die Lieb sich nehrt

Gleich wie vom fetten Oel ein glut vnd flamm sich mehrt.

So hurtig kan die Lieb ein schönen wechsel finden

Vnd von deß Fiebers hitz jhr Fackel selbst anzünden

Davon krafft kühlung trost ein Hertz im ander hat

Vnd wird von steter Lieb doch nimmer müth noch matt.

Die kousche Lieb ist selbst jhr Seugam vnd ernehrer

Vnd findetnimmer mehr kein Rauber noch Zerstörer

Wo fern sie beide nur in gleicher wage stehn

Wo fern sie beide nur in einem gleisse gehn.

Kraut Wurtzel Safft vnd Tranck hab ich gar offt gehöret

Zu brauchen ist vmbsonst damit Lieb werd gemehret.

Dann eins dem andern offt so brauchen will die kunst

Den Todt zu trincken gibt an statt der Lieb vnd gunst.

Lieb selbst der Liebtranck ist lieb selbst die Lieb gebieret

Wie in eim Thal vom schall ein widerschall herrüeret

Die Lieb durch Tranck gemacht mit haß doch endlich lohnt.

Die Lieb durch Lieb gemacht bey zweyen ewig wohnt.

Von diesem Liebtranck nun beid Ehleuth sollen trincken

Wann in dem haußstand will das Glück bißweilen hincken:

Wans nach deß Ehestands brauch nit wie jhr wollet geht

Wann nicht der Windt allzeit wie jhr begehret weht.

Ein solchen Liebtranck wolt einander fleissig bringen

Biß jrgend in eim Jahr wir also weiden singen:

Secht was der Liebtranck hat gewirckt in dieser Zeit.

Diß wird alsdann euch sein die höchste lust vnd frewd.