1

Signor, se per pietà no ti soccorri

Sti to moderni meschini poeti,

I vedo tanto grami e povereti

Che infina i sassi ha compassion de lori.

Tutte le so fadighe e i so suori,

Compona pur e canzon e sonetti,

No è bone da cavar quatro marchetti

Da ste arpie, da sti mostri traditori.

Una de do: o fa che sia bandìa

Sta profession, o più severamente

Castiga, che no se usa l'eresia.

O manda adosso a cusì crudel zente

Una sorte de nuova malatia

Che la varissa i versi solamente.