16

Vedenno ss' uocchie m' ascio milo sciuoccolo,

Anze devento russo comme a gàmmaro:

Sentennote parlare io so' catammaro,

Piezzo d' anchione, senza chierecuoccolo!

Penzanno sulo a te me ne vao 'nzuoccolo,

E resto comme a pesce appiso a l' àmmaro:

Ma quanno chiagne io torno arce–catammaro,

Ed a sso chianto spico comme a bruoccolo.

Scioresco comme a sciore de ienestrece

Si tu po' ride: arreto se ne traseno

Le doglie meie, e me ne vao 'nn estrece.

O bella cchiù che d' Apoleio l' aseno!

Io pe l' ammore tuio me farria estrece,

Deventarria perzì sei vote arcaseno!