17

O facce assai cchiù ghianca de n' avorio,

Che cchiù polita non se porria fegnere:

Cchiù liscia de na banca de scrittorio

Che sospiranno sempe me fai stegnere:

Tu sola fai venireme lo sborio,

Tu sola chisto core me puoi stregnere!

Cierto, si fosse vivo Messè Frorio

A la taverna soia te farria pegnere.

O vocca assai cchiù doce de le zeppole

Quanno so' chiene de cannella e zuccaro,

Pastose, molle, e senza le rechieppole:

Pe averete iarria fi' a Castrocuccaro!

Ma po' me dace Ammore tanta léppole

Che me fa ghi' strillanno comme a luccaro.