20

O Cecca mia, comme t' haie puosto mone

A ssi capille ssa tremenna spata?

Che fuorze sì Marfisa deventata,

O Gian Ferrante sì co lo spatone?

Mo che faie sso terribole scassone

Ogne ncore ed ogn' arma è annegrecata:

E mo che baie de chessa spata armata

Ammore spezza l' arco a no maotone.

Ah, c' hanno apierte l' uocchie li gattille,

E beo quanto sì cruda, e già m' accora

Ssa 'nzegna c' haie de morte a ssi capille.

Non te vastava, o cana tradetora,

De sbennegnare mille core e mille,

Che muove guerra a li peducchie ancora?