21

Chesse zizzelle, o Cecca, a chisto come

Me fanno a buoine cchiù na grossa guerra.

Ma zizze no: song' otre, addove Ammore

Ogne nsospiro mio nce 'mpizza e 'nzerra.

O so' zampogne ? O songo, a lo iancore,

Cocozze fatte a sse padule 'n terra?

O vessiche de nzogna a lo sapore?

O songo doie cognòle de la Cerra?

O so' pallune chisse, e so' abbottate

Da l' acqua de sto chianto e da lo viento

De li sospire mieie tanto arraggiate?

Overo ognuna è bértola o visaccia?

Ammore, si vuoie ch' esca da trommiento,

O fa' che l' aggia 'ncuollo, o l' aggia 'mbraccia.