25

Quanno io sto sulo penzo nfra de me,

E mille cose 'mpìzzome a lo tòtano;

Dico ca voglio dire: “O Cecca, aimé,

Pe te ste chiocche tanto me revotano !”

Po', quanno le sto 'nnanze, io iuro, affé,

Ca tutte li penziere mieie se sbotano.

Non teng' armo de di': “Cecca, pe te

St' uocchie comme a centìmmolo me rotano”.

Che serve a di' ca voglio fare e dicere,

Si 'nnante ad essa torno no cucù,

Né de le pene meie dico tre cicere?

Ca chiagne e baie e biene e buote e ruozzole,

Che faie, o core mio ? E non saie tu

Ca porta maie non s' apre si non tuozzole?