26

Ca t' arrecigne, o core, e rieste affritto,

Ca criepe e schiatte 'n cuorpo, di', che faie?

Che pienze fuorze ascire da sti guaie

Co stare sempe muto e sempe zitto?

No, no, vattenne a Cecca a pede fitto,

E contale li guaie e catalaie

E di': “Cecca, io pe te sto affritto e sfritto,

Io abbampo, io spereteio, e no' lo saie !”

Di' ca chess' arma scura è fatta pazza,

E ca mme caco sotta de paura

De le dire a lo mmanco: “O gran canazza !”

Va', parla, regnoleia, chiagne e spapura!

Saie ca se dice: “Ietta verbo 'n chiazza,

E lassa adoperare a la natura”.