31

Bello pallone gruosso, o quanto, o quale

T' arresemmeglio, sfortunato mene!

Tu staie chino de fieno, io de catene,

Tu hai no pertuso, agg' io chiaia mortale.

Cecca, a te, mo te ietta e mo te tene,

A me, mo me vò bene e mo vò male;

Tu ciento tommarielle haie 'ncoppa a ttene,

Io sopra porto tutto no 'spetale.

De spingole sì tu 'mpizzato e chino,

Io tengo 'n cuorpo sempre no spontone

Che mme percia lo core e lo stentino.

Sulo 'n chesto sgarrammo, 'n crosïone:

Tu quarche bota puro le staie 'nzino,

Io faccio spotazzella a no pentone.