34

A Puorto vaie, o Cecca, a Puorto, addove

Nc' è lo bene de Napole accogliuto:

Ma comme so' catammaro e paputo!

Cchiù nce ne puorte tu che nce ne truove!

Mo sì ca lo Pennino è già falluto,

Mo sì ch' a Puorto nge so' frutte nuove,

Pecché n' uocchie spantuso che tu muove

De vierno faie lo niespolo scioruto!

Avarraie, Puorto mio, sempre confuorto:

Io sulo chiagnarraggio, ammaro e affritto,

Contra raggione scurzo, acciso a tuorto!

Damme no sguardo de ss' uocchie deritto,

Portame a puorto, mentre alluoggie a Puorto:

Fuorze che boglio ? No vasillo schitto!