38

Dall' arvole ogne nfronna era caduta,

Li munte erano tutte ianchïate

Ogn' erva da la terra era sparuta,

Ogne sciummo li piede avea legate,

Quann' eccote ste cose io veo mutate:

La terra a buoine cchiù tutta sciuruta!

Le gente steano tutte ammentecate

Perché sta cosa fosse 'ntrabbenuta.

'N chesto Cecca mia bella io vedde tanno

Dinto a n' uorto de foglia e de scarole

Pascere no martino, e ghiea cantanno.

“Perzò, diss' io, so' 'sciute le bïole!

Ch' allora so' li sciure e l' erve quanno

Sta 'nsembra co lo piecoro lo sole”.