39

Na dommeneca Cecca se vestette,

Isce bellezzetuddene ched era!

Fece strasecola' chi la vedette,

Ca parze Cocetrigna o Dea Mecera.

Tanta scìsciole e nocche se mettette

Ch' io disse: “O Cecca, e che, sì fonnachera?

Ca pare, co sse trezze a canestrette,

Iommenta che se venne a quarche fera”.

“De ssa 'nzalata, di', chi te nne prega?

Che s' a la casa mia sti sfuorgie traseno,

Mamma l' ha a gusto, e mai non me le nega”,

Respose Cecca. Ed io restai n' arcaseno,

E disse: “Veramente che se lega

Mo lo patrone dove vòle l' aseno”.