40

Io disse: “Ammore, Cecca sta arraggiata,

Me tene mente stuorto e me sbraveia:

S' io piglio pe parlare, essa 'nzorfata

Me 'ngiuria, e pe l' arraggia se vaveia.

S' io l' aggio co sto core sempe ammata

Comme chest' arma mo m' annegrecheia?

Se ha da durare troppo sta iornata,

Ammore co sse frezze me frezzeia.

Di', quanno scomparranno tanta guaie?

Starraggio maie cchiù 'n grazia a mammagnora,

O Cecca mia non me vorrà cchiù maie ?”

“Che trivolo mmarditto è che t' accora? ,

Respose Ammore. Appila ! E tu non saie

Ca vene cchiù 'n cient' anne che nne n' ora ?”