4

Quann' io vediette Cecca avea cacciate

Li viente fridde Zéfero, ed a ffare

Pace stea co Nettunno e ad allegrare

Le gente, pe lo friddo arrecegnate.

Tanno perzì sciorevano li prate,

Li iacce accomenzavano a squagliare,

E Apollo non faceva cchiù spotare

Le nuvole represe e accatarrate.

D' ogne pertuso la lacerta asceva,

Lo toro co la vacca s' accostava,

Lo caperrone co la crapa steva;

Lo cane co la cana gnenetava,

Lo compagno la tortora chiagneva,

Cantanno ogne aucelluccio s' allegrava.