41

Cecca facette mascare no iuorno,

Credenno che non fosse canosciuta,

E ballava accossì, bella vestuta,

A suono de na cetola e no cuorno.

Ogn' arma a bocca aperta stea speruta

De quanta nce ne stevano llà attuorno;

Io mo, 'nmederla, disse: “Sta cornuta,

Aiméne, è chella che me dà taluorno!

Non serve, o Cecca, a fa' lo risariello,

Non te annascunne a sto dito dereto,

O de sto core mio suglia e scarpiello!

Non pò chisso sbrannore sta' 'n segreto:

Perché ssa facce è comm' a cantariello,

Commoglia quanto vuoi, ch' esce lo fieto”.