43

Aveva saput' io da na vecina

Ca se voleva Cecca mia progare:

E avenno da piglia' la mmedecina

'Nzemma co l' aute me nce voze asciare.

Ce iette assaie pe tiempo la matina,

E co ste mmano nce la voze dare;

E po' che l' appe accisa na gallina

Sautaie no poco pe la fa' spassare.

Me se smosse lo cuorpo a la 'mprovisa

Comme magnato avesse pastenache;

'Nsomma allordaie de cacca la cammisa.

Lo fieto m' accorava de le brache

Ma Cecca disse, fattase na risa:

“Piglio io la mmedicina, e tu la cache !”