44

“Viene sta sera, affé, ca te 'mprommetto

De fare quanto vuoie”, tu me deciste:

Ed io pe l' allegrezza che me diste

Fa' cunto ca scolaie e ghìje 'mbrodetto.

Vengo la sera, sisco, rasco, aspetto,

Ma tu, cana cornuta, maie veniste:

E creo ca me sentiste e me vediste,

E me gabbaste pe me fa' despietto.

Perché ghiurare pe lo iuorno d' oie

E dicere: “Sta sera a notte torna”,

Si non n' haie fantasia e si non vuoie?

Siente sta cosa, Cecca, e po me scorna:

Dice lo mutto: “Legase lo voie

Pe la parola, e l' ommo pe le corna”.