46

Cecca, si tu no' lasse sso tabbacco

Che piglie pe lo naso e pe la vocca,

Tieneme pe no puorco o no porchiacco

Si non te schiaffo 'n capo na sagliòcca.

Tu m' haie 'ntronata chesta chierococca

Ca pare ogne sternuto tricchetracco,

E chisso naso fatto a bernecocca

Fete cchiù de le nateche de Bacco.

Sta cosa è no remmedio de Torchia:

Sta porva, accossì gialla preparata,

Pare de strunzo, bella facce mia!

Ma tu tanto haie ssa forgia squacquarata,

Che si pigliasse na tabbaccaria

Tutta la strodarrisse a na sorchiata.