47

Bene mio bello, e che faore è chisto?

E che gran compremiento è che me faie?

De castagne spistate ogge tu m' haie,

O Cecca, pe no mese e cchiù provisto.

Fuorze sso core a cheste boglie è listo,

E 'nzigno sso presiento tu me daie?

O chisso, aiméne, è quacche agurio tristo,

Mostranno ch' a ste pene 'ntristarraie?

O vuoie dicere tu ca solamente

Chiagnenno a chisso core 'mpantoscato

Faraggio arremollare, e no' autamente?

Overo co sto duono che m' haie dato

Me desidere tu scuro e scontente,

C' aggia la pelarella e stia spennato?