47

Apollo, se ti sa de medesina,

Quello che ho letto in diversi autori,

Muòvete dal to Ciel, vien e soccorri

Per compasion sta povera meschina.

Te mandarave ben de la so orina,

Ma el mal che l'ha puol causar di errori,

Che in tel usir, quando l'à toccà i orri

La deventa de zalla carmisina.

Bisogna che ti vegni e che ti vedi,

Vorrìa dir, che ti vardi, ma cognoso

Che ghè da far pi assai che ti no credi,

Che el mal è penetrà de là dall'osso,

Pur ghe xe dei siroppi tanto freddi

Che i puol levarghe el cancaro d'addosso.