49

Era lo tiempo quann' ogne zetella

Pe tirare cetrangola s' affaccia,

E co lo scuro de na caudarella

Lo Carnevale a la fenesta caccia,

Quanno venette zitto Ceccarella

Addorosa de trippa e de guarnaccia,

E co le mane tente de tiella

Sparai no riso, e me tegnìje la faccia.

Io che me vidde co na facce penta,

Pe scuorno m' assettai 'ncoppa a no travo

Comme a guarzone ch' esce da la tenta.

Po' disse: “O Cecca, tu l' hai fatta bravo:

Mente m' hai fatta chesta facce tenta,

De la bellezza toia chiammame schiavo !”